Narozprávala: Nikola Mitrášová
Milena Hübschmannová
Jekh grofos avelas khere pal e špacirka, sas bokhalo, ta geľa andre karčma te chal. Mangľa peske štar tade jandre. Chaľa len, kamelas te poťinel, dikhel, kaj leske o bogiľaris, aľe avľa upre, hoj mukhľa les khere. Phenďa le karčmariske: „Karčmarina, ma ruš, mukhľom khere o bogiľaris, tajsa tuke miro sogaľašis anela o love.“ Kajča o grofos sas manuš bisterdo – pre aver ďives o love le karčmariske na bičhaďa, bo bisterďa. Pregeľa jekh berš, pal o jekh berš avel le grofoske ľil pal o sudos: „Dži trin ďives mušinen te poťinel jekh ezeros koruni le karčmariske. Te na poťinena, džana andre bertena.“ O grofos ačhiľas olestar naužardo. „Vaš soske mange kampel ajci love te poťinel?“ Paľis aviľa leske pre goďi, hoj bisterďa te del pale o kamišagos vaš o štar jandre. „Vaš o štar jandre kampel mange te poťinel jekh ezeros koruni? Diliňaľiľa o karčmaris?“ O grofos le karčmariske jekh ezeros koruni na poťinďa, ta les vičinde kijo sudos. Avel o grofos kijo sudos, phučel lestar: „Sar oda šaj, sudcona, hoj som te poťinel jekh ezeros koruni vaš o štar tade jandre?“ O karčmaris phenel: „Šunen rajale, andal sako jandro šaj bijanďiľa kachňi. Sako kachňi bijanďahas ajci the ajci jandre. Ole jandrendar pale šaj bijanďile ajci the ajci kachňa.Te bikenďomas savore kachňen, save šaj bijanďile andal o štar jandre, zarodňomas jekh ezeros koruni. O grofos ačhiľa sar kašt. Mangelas le sudcas, kaj les te del jekh kurko, hoj peske arakhela advokatos. O sudcas les diňa, jekh kurko. O grofos rodelas advokatos, rodelas, aľe ňiko pes pr’oda na kamelas te del. Ko grofos sogaľinlas Rom o Jančis. Dikhel, hoj o grofos apsenca andro jakha phirel upre tele, phučel lestar: „So pes tumenge ačhiľa, grofona?“ „Te džanehas, Janči! Bari bibacht pre ma peľa.“ „So ajso,“ phučľa o Jančis. „Phenel pes: nane ajso ďives, so pal leste na avel e rat u nane ajsi rat, so pal late na avel o ďives.“ O grofos le Jančiske sa vakerkerďa avri. „Te man dena, grofona, ajci love, keci bi denas nekfedere advokatoske, lava tumen andal tumari bida avri. Aľe mušinen mange advokatska gada te cinel. Me tumenge džava advokatoske.“ O grofos kerďa sa, so lestar o Jančis mangelas. Iľa peske le Romes advokatoske. Pregele trin ďivesa u o Jančis bičhaďa le grofos punkt eňa orendar pro sudos. „Ma daran,“ phenel le grofoske o Jančis, „me avava pal jepaš ora. Ča phenen le rajenge, hoj kampel te užarel pre tumaro advokatos.“ Mišto. O sudcas užarelas, o karčmaris užarelas u o grofos phenel: „Ma rušen, rajale, kampel te užarel pro miro advokatos“. Jekhvareste avel andre o Jančis, urdo andro advokatska gada. „Kaj salas ajci, advokatona?“ „Ma rušen, rajale, aľe tavavas chirchil, bo les palodilos kamav te džal te šejinel. Džanen, hoj o chirchil taďol but.“ „Oda advokatos diliňaľiľa!“ šuškinen penge o raja jekhetane. „Jov kamel te šejinel tado chirchil!“ „Advokatona,“ vičinel o karčmaris, „tu paťas, hoj tade chirchilestar tuke vareso barola?“ „Ipen kada lav tutar kamavas te šunel, karčmarina!“ phenel o Rom, o Jančis. „Akana mange phenen, rajale – the tu karčmarina – šaj e kachňori avel avri andal o tado jandro?“„So pre koda phenes, karčmarina?“ phučel o sudcas. O karčmaris na džanelas te phenel aňi jekh lav. Bizo hoj o love na chudľa, mek le grofoske mušinďa te poťinel vašoda, hoj les anďa andre ladž. O grofos diňa le Jančiske ajso honoraris, hoj peske cinďa baro kher pro Čechi. Adaďives hino podňikateľis, či so, na džanav. Te na mule, dži adaďives dživen.
o bogiľaris – peňaženka, te akharel – volať, pozvať, bizo – samozrejme, e bibacht – nešťastie, te bijanel jandre – znášať vajcia
ADAMOVÁ, I. – ADAM, G. 2015. Rozprávky v slovenskom a rómskom jazyku. Bratislava: ŠPU, 2015. s. 92-93. ISBN 978-80-8118-157-3. https://www.statpedu.sk/files/articles/nove_dokumenty/projekty/eea_grants/rozpravky-slovenskom-romskom-jazyku.pdf